අරුණ වැටෙනු පෙර අවදිව හිමිදිරි
ඒමට ඇත හිරු කිරණක් නොදකින
සුදානම් විය යුතු අද දවසට මේ ලෙස
එමටම ඇත වැඩ ගොඩ නම් සිතු ලෙස
මේසය පුටුවද ඇත නම් නිරතුරු
රැඳුමට ඉඩ නැත වැඩ ඇත එමටම
සුළු වැඩ බර වැඩ අමතර ඒ වැඩ
පදමට ඇත පැය අටටත් වැඩි සඳ
මේස පිහන අතු පතු ගානා වැඩ
තේද වතුර අහරද බෙදනා වැඩ
වැසිකිලි කැසිකිලි පිරිසිදු කරනා වැඩ
දවස ගෙවෙයි දහදිය වගුරාගෙන
සර් මැඩම් මිස් කියා නැමෙනු ඇත
කොන්ද කෙලින් නැතුවා අද දවසට
ඇනුම් බැණුම් ගැරහුම් නම් අඩු නැති
හොඳක් අසන්නට නම් ඒ ඉඩ නැති
ඉඳ හිට පැමිණෙන ලොක්කන්ගේ ඇති
ඝනකම ගෙරවුම් බර වදනින් ඇති
වැඩ මදි තව නම් අවැසිය කඩිසරකම්
පැමිණිලි නම් ඇත ඇගයුම් නම් නැත
දිවා රෑ නොබලා වෙහෙසට පත්වන
පැය අට නොව දොළොසක් අද වෙහෙසන
නිරතුරු ශ්රම බල සූරා ගෙන කන
තුට්ටු දෙකක් ඇත සැම මස අගටම
කොස්සට ඉදලට බිම පිසිනය වෙත
පිඟන් කොප්පද තේ රොඩු බොඩු වෙත
මහ මග ගොඩ ගැසි කුණු කඳු රැළි වෙත
පමණද අපගේ දිවියේ අයිතිය වෙත
රතු ඇඳිවත ඇඳි නෝනලා මහතුනි
අප දුක නොදකිනු මන්දැයි නොදනිමු
අයිතිය නොමැතිද අප හඬ නැගුමට
අහිමිද අප හට ඔබ පන්තිය නිර්ධන
---රකිත---