~~ යථාර්තය ?? ~~

වරක් බලා

යළි නොබලන

හිස ගස්සා

පසෙකට යන

කරදර

බැල්මෙන්

මුමුණන

කුමන අරුම

මෙලෙසින්

යන

නෙතු

කොනකින්

බලන කලක

අප්‍රිය බැලුමන්

හෙළන

සඳක

පසු කරගෙන

ඉවතට යන

කිමද වරද

කළ මා

ලැබෙන කලට

අවස්ථාව

පිට පිට

වදනින් හී සර

මුළු තලයට

ඇසෙන නදින්

කරමින

අපහස උපහාස

හදද සිතද

පාරවන්න

දනිමි කඩුව

මුවහත් නැති

ශිල්ප සතර

ඉහළ මට්ටම් නැති

අයත් නොමැත

එන්නටද බැරිය

පොෂ් රිච් සමාජයට

සිතේ නිතර

නොගැලපෙන්න

ඔබ සියල් සමග

දකින කලක

ප්‍රියමනාප

නැති වග නම්

දැනේ මුහුණ

කතා බහද

හැසිරෙන හැඩ

නොදිරවන්න

ඇති බව

සැක හැර

දැනෙන්නේ

වෙනසක් නම්

කළ නොහැකිය

පෙර කළ දෙන

කරුමය ඵල

හැඟවෙන්නේ නම්

නුසුදුසු බව

තව දුරටත් මෙලෙසට

පවසනු මැන ඍජුව

මුවට අත්හැර

යෑමට වෙනතක

දනිමි සොඳින් නිතර

නිසි දෑ නිසි කල

නොකළ බවට

අල්පය වයසට

හා සමව ලැබූ

සමාජයීය දැනුම

එමෙන්ම දනිමි

නුඹලා මෙන්

බ්‍රයිටෙකු

නොවන බවට

තනිව ගෙවමි

දිවි කතරම

හැකි තුරු

අනුනට බරක්

නොමැති

දරන්නටම

නොහැකි කලක

තිතක් තබමි

රුදු දිවි

ගමනට

---රකිත---

~~ උණුසුම් දිනක පහස / සිතුවිලි ~~

නුබ ගැබ දිලෙයි නිල් පැහැයෙන් වළා නැති

හිරු දෙවි දිලෙයි හිස් අහසට තනිකමක් නැති

රිවි කිරණ සිපින මිහිකත නම් සිසිලසක් නැති

කුමන අරුම දාහය වසත් කල කිසිදාක නැති

ගෙවෙන රැයක දැනෙනා සිසිලසක් නැති

නැගෙන අරුණ දැනෙනා සිසිලසක් නැති

යනෙන දිනක දැනෙනා සිසිලසක් නැති

විඳින කරුම දැනෙනා සිසිලසක් නැති

පුරා දිනක දහදිය ගත වැගිරෙන්නේ

සිසිල් ජලය නිති ගත සිත පුබුදන්නේ

වියළි කලට නින්දක් නැත පැමිණෙන්නේ

දරනු කුමට දාහය අද මෙලෙසින්නේ

උදයක සුවය නොලැබෙන උණුසුම් උදය

දහවල මිහිර නැත අද චණ්ඩය හිරු එලිය

සවසක පහස නැත දාහය ඇත අවර හිරුය

රැයක සිසිල නැත නොලැබෙන නිදි සුවය

ඵලද නොමැත තුරුලිය පෙනුමක් නොමැති

සෙවණ වුවද ගිනියම් ඇත තුරු පාමුලැති

රැඳිය නොහැක පිටට ගත දවනා හිරු එලියැති

නපුර කිමද සියල් සතුන් විඳවන මෙලෙසැති

උගුරු දඬු දවන නිම් නැති පිපාසය දුකකි

දහදිය දමන ගත දවනා නිති දාහය දුකකි

නිතර කිපෙන සැනසුම් නැති සිත දුකකි

කරන කලට වැඩ උණුසුම් දිනයක දුකකි

ගතට සිතට සැනසුම නැති උණුසුම දරනු බැරි

පිටට ඇතුළ සිටුමට නැති උණුසුම දරනු බැරි

වැඩට කලට කරනට නැති උණුසුම දරනු බැරි

නොමරා මැරෙන ගති ඇති උණුසුම දරනු බැරි

සැනසුමට මිහිකතද වියළි ඉරිතලා ගිය

සැනසුමට තුරුලියද මැලවි ඵල නැතිව ගිය

සැනසුමට සියල් සතුන්ද පීඩිතව ගිය

සැනසුමට දිය බිඳක් හෙලනු මැන දිරිය

( රුදු නියඟය නිමා වී මහ වැසි ලැබේවා ! )

---රකිත---

~~වැසි කවියක්~~

නීල වළා රොද බැඳෙනා - නුබ ගැබ අඳුරට වන්නා

සිසිල් මද නලද හමනා - වැහි බීරුම මග එන්නා

සිරුරෙහි හිරිගඩු පිපෙනා - සිරි හිරිකඩ ඇද වැටෙනා

නුබ ගැබ හෙණ එලි එන්නා - වැහි රැල්ලක් ඇද හැලෙනා

දිය බිඳු මිහිකත සිපිනා - සුළඟට තුරුගොමු වැනෙනා

ගඟ ඇළ ළිඳ උතුරන්නා - දිය මත මඩ ඇතිවෙන්නා

සිසිලස ගත දැවටෙන්නා - නිදි සුවයක් ලැබගන්නා

නැවුම් සිහින දැකගන්නා - මුදු සුවයක සැතපෙන්නා

දිය රැළි පහළට ඇදෙනා - ගෙඹි හඬ නිරතුරු ඇසෙනා

කුඩ දිග හැර පිටටම බසිනා - තුටු ලෙස පිරි වැසි නැටුමා

තුරුලිය වැල් දළුලන්නා - ළිං වැව් පොකුණුද පිරෙනා

ගත සිත දෙක පුබුදන්නා - තුටු ලෙස වැසි ඇද වැටෙනා

කෙත් වතු නිල්ලෙන් පිරෙනා - ගඟ ඇළ දොළ සවි කරනා

සිසිලෙන් ලොව සනසන්නා - නැවුම් දිනක් ගෙන එන්නා

ගංවතුරක සේයා එන්නා - ඉපනැල්ලේ පහුරක් පදිනා

මසුන් කෙළින සැටි දකිනා - දියක පහස ලැබගන්නා

රුදු නියඟය නිමවන්නා - මනු සිත ගත සනසන්නා

දිය ගොඩ සරු කරවන්නා - මුළු ලෝකය ගලවන්නා

නිති දාහෙන් දුක විඳිනා - අප වෙත අනුකම්පා කරනා

වැසි දෙවිඳුනි වැඩ ඉන්නා - මහ වැසි ලොව එවනු මැනා

---රකිත---

අපූරු සිහිනය

 

සිතින් දකිනෙමි

සිහිනයක්

සුළඟිල්ලෙන්

අල්ලා ගෙන

සුරතල් සිනහා පිරි

කුඩා දියණියක්

වසරක් වයසැති

කුඩා පුතු

රැගෙන

එක් අතකින්

සිහින කුමරිය

පැමිණේ

පෙර මා පැතූ

තුටින් විඳින්නෙමි

ආදරය

සෙනෙහෙබර

කුල කුමරියද

කුඩා දරු

දෙපෙල හා

සම උපාධි

සුදුසුකම

මනරම් නිවසක

අසිරිය

සිව් සක රියක

අයිතියද

ඉහළ වැටුපක

විධායක

ශ්‍රේණියේ උසස්

වීමක්

පැතූ සැපවත්

දිවිය

අත පොවන

මානයේ

බිඳී යයි

හිස වදින සඳ

රථ කවුළුවේ

වදින කළ

හොරා මාපකයේ

සිනුවේ නද

උදෑසන

---රකිත---

අවාසනාව ? කරුමය? ලැබිම ?

විටෙක සිතේ

කෙතරම්

අවාසනාවන්ත

වීද මා

සබඳ

පිළිගත් පෙනුමක්

හැඩක්

නැති

මුදල බලය

සමාජ

අපේක්ෂා නැති

වන්නන්නට

නොමැති කඩුවක්

මුවහත්

අධ්‍යාපන ලබන

මුත් සමාජ

පිළිනොගත්

නිසි කල

වයසේ

නිසි දෑ නොකළ

කරුමයට

විඳවන තනිව

නොලැබෙන

ප්‍රේමයක්

අපහස උපහාස

උසුළු විසුළු

ගැරහුම්

නිති ලබන

කෙසේ නම්

විඳවම්ද

උසුලම්ද

කරුමය මෙසේ

ලැබූ පිනැති

මිනිසත් බව

නොමිනිසුන් මැද

දිවි ගෙවන

නිතොර

---රකිත---

සිතට දැනෙන කවි සීපද II

සොඳුරු මිතුරියගේ විවාහ උත්සවය

කලක පටන් දැන හැඳින

සිටි මිතුරිය සොඳුරු

උදයක හමුව දෝතින්

දුනි මඟුල් ආරාධනා පත

කරුණු අවැසි නැත

නොපැමිණ සිටි නොහැක

මිතු දම් නිමයි නොපැමිණි

කළ මඟුල් ගෙට

පුරුදු මද සිනා මැද ඇරයුම්

ලැබගතිමි මංගල්ලයට

පිං සිදුවන්නට රියදුරුට

පුද්ගලික බස් රථය පැදි

ගිලිහුනෙමි දැකගන්නට

මොහොත ඒ පෝරුවේ

චාරිත්‍ර පැවති උදාරත්වය

හිරු මුදුන් වන මොහොතෙ

හාත් පස ගිනියම් වන කලක

ලඟා වුනි මග ගෙවා කෝපෙන්

විවාහ මංගල දිනය පවත්වන

ඒ සොඳුරු නැවතුම වෙතට

පුරුදු මද සිනාවෙන් ඔබ

පිළිගැනුම ලැබගතිමි

සොම්නසින් සිත පිරුණි

ඔබ පැතූ සිහින සැබෑ වුනු කල

මේ සොඳුරු නිමේෂයේ

නේක පැහැ ගත් විදුලි එළි මැද

ගැයුම් වැයුම් වැනුම් නැටුම් මැද

හඬ ගැටෙනා මධු විත බඳුන් මැද

සිනහා ඉතිරෙනා මුදු කියුම් මැද

මඟුල් සිරිය පැතිරේ සිරියාව මැද

රැගෙන මල් කළඹ උඩරට මනාලිය

රැගෙන අතිනතද ඔහු හා තුටින පැමිණ

සැම වෙතට ගොස් හඳුන්වා දෙමින්

ඔවුනොවුන් වෙත තුටින් ඒ දෙපෙල

පැවති සේයාව ජය ගැනුමක සොඳුරු

මංගල භෝජනයෙන් පසු රසවත්

සංගීත නාදයෙන් මන්මත් කර සිත්

බලා සිටියෙමි සූදානමින් කැමරා නෙත්

රුව නැගුමට පිටත්ව යන නැකතටත්

තුටින් කෙරෙන මංගල යුගල නැටුමටත්

සමුගැන්මට පෙර ඇයගෙන්

අත තැබිමි සුභ පැතුම් පත

තිළිණයක් සමගින් පැසසුම්

සුභ පැතිමි දෙපලටම

සොඳුරු සුභ අනාගතයකට

සමුගෙන සියල්ලන්ගෙන්

පැමිණෙන ඒ මොහොතේ

නොදැනුනා නොවේ කෙදිනද

සැබෑවක් වන්නේ තුමු

මංගල සිහිනය සොඳුරු

---රකිත---

ඔබගේ මතු දිවියට මගේ උණුසුම් සුභ පැතුම් දිලිනි වත්සලා මිතුරියේ !

සිතට දැනෙන කවි සීපද

උකුල හැඩ වෙන්නේ කාලයක් තිබුනාම

බෙල්ල හැඩ වෙන්නේ මුතු පොට තිබුනාම

මුහුණ හැඩ වෙන්නේ සිනහව තිබුනාම

කෙල්ලෝ හැඩ වෙන්නේ කොල්ලන් හිටියාම

බොඩිය හැඩ වෙන්නේ සික්ස් පැක් තිබුනාම

කොණ්ඩ හැඩ වෙන්නේ ජෙල් තෙල් ගෑවාම

මුහුණ හැඩ වෙන්නේ රැවුලක් වැව්වාම

කොල්ලො හැඩ වෙන්නේ කෙල්ලන් සිටියාම

හැඩට ඉන්න පුළුල් උකුල ඕනෙමද

මාල නොමැති කරක හැඩක් නැතුවාද

සිනා නොමැති වතක අසිරි දැනුනාද

හැඩට වැඩට ඉන්නට කොල්ලන් අවැසීද

කෑලි හයක ගතට වඩා නේරූ උදර සුන්දරදෝ

ජෙල් තෙල් නැති කොණ්ඩය අඩු හිස මුදුනත සුන්දරදෝ

රැවුල කපා ඇති පිරිසිඳු වත කෙතරම් සුන්දරදෝ

කෙල්ලෝ නොමැති තනි කඩ දිවියම මෙතරම් සුන්දරදෝ

ජැන්ඩි පහට හැඳ පළඳා විලවුන් ඉස ගත පුරාවට

කොණ්ඩය හැඩ වැඩ දමලා රැවුලද සකසා මුව පුරාවට

කාසි පනම් කාඩ් පතද  ස්මාර්ට් මෙවලම් ගෙන අත පුරාවට

දෙමුහුන් රථ ගායෙන් රිච් පොෂ් රවුම් ගසයි නුවර පුරාවට

ගතින් අඩක් පමණ වැසෙන සළු පිලි ගත දවටා ගෙන

මුහුණ අතද පය නියපොතු මේකප් තලියෙන් වසා ගෙන

ඉංගිරිසිය මුසු බසකින් මුදු හඬකින් දොඩමළු වෙන

රිච් පොෂ් කොල්ලන් එක්කම ඉගිලී යති නිදහස් වෙන

රථයක් නැති මුදලක් නැති බලයක් නැති ඒ අතරට

සැපයක් නැති හොඳකුත් නැති කරුමය ඇති ඒ අතරට

දුකකුත් ඇති විඳවුම ඇති මමද අයිති ඒ අතරට

දුරක සිටන් බලා සිටිමි දස්සන විසූක ඒ අතරට

හැඩයක් ඇති කොල්ලන් ඇති හැඩයක් ඇති කෙල්ලන් ඇති

දුක සැප දෙක නිති පෙරළෙන කල් ගතවන ලෝකය ඇති

හැඩයක් නැති රිච් පොෂ් නැති අසරණ කම ඒ තුළ ඇති

නිහඬව නිසලව සිටිමින් සිතමි යථා බව එහි ඇති

---රකිත---

ආරම්භක කවිය චතුර රංගන මහතා විසින් නිර්මාණය කරන ලදී