~~ මොහොතක ඉනික්බිති ~~

ශුද්ධ වූ ජලය ලැබූ ලෙස වුව

ගී ගයනා සියොතුන් ලෙස වුව

ඉඩෝරයට වර්ෂාවක් ලෙස වුව

ඒ ලැබි සියල්ල අවසාන වී ඇත

දිගු රැයක් නිමවා අඳුරු වූ දින 

උදා හිරු නැගී දුන් ආලෝකයෙන්

දෙනෙත් විවර කර බලනු මැන

සියල්ල නිවැරදි වනු ඇත දිනක

සුසුමක හෝ එක් හුස්මක රැඳි

නොදැනුනු හැඟුමක සටහන් මත

රැළි පිට රැළි නැගි වුව එය හැර යන

නිමාව ඇත දැන් නිදහස් වන්නට  

ඉහළ අහස් කුස පහළ පොළෝ තල

පාෂාණිභූතව ඇති ලොව තුළ

දෙදරවා සුනුවිසුණු වී ඇති සිහිනයන්

මැද තනිව සිටිනා ලෙසින් හැඟෙනු වස්

ඇස් මානයේ පෙනි සවනතට වැකි

පරාසයෙන් ඔබ්බට විතැන් වී ගිය

බලවේගයක රැඳි ආත්මයක තතු

පවසනු ඇත අනන්ත වූ ප්‍රේමයක්

--- රකිත ---

~~ පැමිණීම ~~

මද නලින් සසල වන 
තුරු ලතා අතර වුව
නීල නුබ ගැබ තුළත් 
ඇති සේද වළාවන්

කඳු වළලු නුබ සිපින 
සිසිලසින් මන්මත්ව
වසන්තය උදා වන 
බව දනිමි පමාවී වුවද

කුසුම් සුපිපෙනා 
තැනිතලා මැද සොඳුරු 
සිහිවෙනා කල සිරව ගිය 
නගරබද දිවියට

නිරන්තර ලෙසින් 
නිති සිහිවෙනා කලට
පැමිණෙන්න සිත් ඇතිය 
ආපසු ඔබ වෙතට

සියොත් නද රැව් දෙනා 
මිහිරි නද විසිරෙනා
මලින් බර ඵලින් බර 
කෙත් වතුද සරු වෙනා

කලක නුඹ දැක ගන්න 
දින ගණින සැන්දෑවේ
පොර බදන ජීවිතය 
සිරව ඇති තරගයක නැවතී

කාසි පනම් රන් කහවණු 
ධන බල ලබන්නට
වෙර දරා හිරිවැටී 
නැවතුමට මද විවේකයකට

දැකුමට යථා බව 
වටහා ගැනුමට සැබෑ ලොව
පැමිණෙන්න අවසරද 
ආපසු ඔබ වෙතට මට

--- එච්. එම්. ආර්. බී. රත්නායක ---

~~ පෙම් සිතක් ~~

ඔබ රුව දුටු දින පටන්

නොහෙලා නම් ඇසිපිය 

බලා සිටින්නෙමි නිති 

නුඹේ නෙතු දෙස බලා

නොව පමණ එයින් තුටු

කුමක් කරම්ද සිත කියන

දොඩමළු වන්නට නුඹ හා

සිත් දේ සැම කල් සැම විට

ඔබ ගැනම සිතමින් සිටිමි

නිදි නොමැති රැය ගණනක්

නොසිතේ කිසිවක් සිතට

පිරී ඇත එය නුඹ නමින් අද

ඔබ නොමැති විට දිවියම වේ නතර

වෙනතක් නොබලන නෙතින් සිට

ඔබ සිටින විට අවට රැඳි පෙමින්

නුඹම විය මා ප්‍රේමයේ ඇරඹුමක්

ලොව පුරා දිවි මග දකිමි ඔබ රුව

පෙමට පවසනු වදන් නොමැතිව

මා කුමක් නම් කරම්ද සොඳුරියේ

උමතුව ගොසින් ඇත නුහුරු හැඟුමින්

ඔබ නොමැති ලොවක සිටුමට පවා

සිතිය නොහැකිය ඒ රුදුරු තනිකම

දිනක් එනු ඇත අප වෙත නුදුරකදිම

එක් වන්නට ගෙන අතිනත පැතූ ලෙස

--- එච්. එම්. ආර්. බී. රත්නායක ---

~~ නැවත තතු ~~

හදවතින් නැගෙන්නා වූ 

වියෝවක රාවයක්

කිමද අද වන්නට දොම්නසින්

රැඳෙමින් ලොවේ

දහස් ගණනක් වූ පිරිස් මැද වුව

දැනේ තනිකම රුදුරු

සොයන්නෙමි ඒ දනන් අතුරින්

නුඹේ රුව එක් වරක් හෝ

පැමිණෙන තුරා නුඹ නැවතත් දිනක

බලා සිටිමි මා සුපුරුදු තැනම

හැර ගිය දින නුඹ මා අවසන් වතාවට

හමුවූ මතක පිරි තැනිතලාවේ රැඳී

විටෙක දැනේ නුඹ සිටිනා ලෙස අසලක

හමන මෘදු මද පවන දැවටෙන කල එය ගතට

සොඳුරු පිරිමැදුමක ස්පර්ශයේ රසය

ඒ නුඹද ඇත්තේ කියන් මට

කළ වරද කිම කොතැනද පැවසුමට

නොවද වූ වෙන්වීම රුදුරුව

මා නවතිමි සොඳුරියේ හැකිද නුඹටත්

නතර වන්නට මදක් ගිමන් නිවුමට

නොවේ නම් ගිවිසුමකට නැවත

නොවේ නම් නීතියකට නැවත

නොවේ නම් සැකයකට නැවත  

නොවේ නම් අනතුරකට නැවත

වෙන්නට නැවතත් ඔබ හා එක්ව

ගොඩ නගන්නට ලොවක් අහිමි වූ

කමා කර පෙර දින කළ වැරදි අප

නැවතත් පිය මනිමු සොඳුරු එක් මගක

---රකිත---

~~ සැබෑවට කියමනක් ~~

සිතට ගතට හදවතටත් 
නොදැනීම ඉනික්බිති
ගෙවී ඇත වසන්තය 
මුවා වී කාලයට බැට දී

එක්ව සිටි සියල්ලන් 
නොමැත නම් මෙහි තවත්
ඔවුන් ඇත දිවි මගේ 
ජය කණුව වෙත ගොසින්

පමාවට කරුණු කිම 
සොයන්නට කලක් නොව
බොහෝ දෑ අහිමි විය 
නොදන්නා කමට මට

අලස කම කුසීතය 
කියන නෙක අයවලුන්
නොදන්නා බව දනිමි 
හැකියාව සීමා මායිම් ඇතිව

පෙර කළ කර්මයන් ඇතිව
සසරේ කළ හුරුපුරුදුකම්
ඇතිවා නොවෙද එකතුව 
මේ භවයටත් රැගෙනත් ඇවිත්

උත්සාහය උනන්දුව ඇතිව 
කළ උපරිමයද දනිමි
ගමන් කළ හැකි දුරත් 
අවේණිකය ඒ ඒ වෙනසින් අපට

සිප් සතර ලබන්නට 
ඉලක්කය දුර ගොසින්
වයස් පරිණත කමත් 
වේදෝ හරස් වන්නට සිතින්

ගතේ දිරි සිතේ දිරි වේය 
දින දින සීමාවෙමින්
පෙනේ දුර රේඛාව 
නවතින්න සිත දෙමින්

වෘතීයමය බවත් ඇති 
සමාජ තත්ත්ව සහ කාර්යයන 
නඩත්තුව අපහසුය නිබඳ 
සැබෑ තතු වැටහෙනා විට

ඉනිමං තැනූ වෘත්තීය දිවි මගේ 
නැගෙන්නට සිත් නොදේ
ඉතින් මට වෙහෙසයි හොඳින් 
මිතුරු මිතුරියේ සමුගන්න අවසරයි

---රකිත---  

~~ මා දත් දෑ ~~

නුදුටු ලොවක තතු දකින්නට

නුහුරු හැඟුමක පහස විඳිනට

නොලැබු මිහිරක සුව ලබන්නට

පැතුම් දැරූ හදවතක අපේක්ෂාවට

නොලැබූ දෑ බොහෝ ඇති කල්හි

ලැබූ දෑ නොවේ පමණට ඇතිව

සිප් සතර රැකියාව ඉලක්කයන්ද

පසු පසට ඇද වැටේ වූ පීඩනයට

හැර දමා නික්මෙන්න සිතුවිලි ඇතිද

තරගයෙන් නික්මෙන්න නැත වරම්

දැවී මියෙනා තුරාවට තුරුණු මැදි විය

දිවෙන්නට බල වදියි රුදුරු ලොව

අඳුරු වී යන කලට ඉදිරි මග දකින

පහන් එළි නොවේ ඇති සහයෝගයට

මදක් සිට විඩා හැරුමට සහනයක්

සිහිනයක් වී ඇති සැටි බලන් මිතුරේ

මා පැතූ වසන්තය ගෙවී ගොස් හමාරය

ගිම්හානයට පැමිණ සිතුවිලි වේ තුරුණු

අවැසි අනවැසි දෑට කාලයා පැන ගොසින්

තනි වී සිටිමින් බලා ඒ දෙස පසු තැවෙමි

නුදුටු ලොව නොදකිමිය එය නොවේ කැප

නුහුරු හැඟුමන් නොවිඳිමිය එය නොවේ කැප

මිහිරි පහසින් නොලබමිය එය නොවේ කැප

හදවතක පිරි පැතුම් ඉටු නොවේ එයද කැප

---රකිත---

    

~~ තෙහෙට්ටුව ~~

 

පුරා දශකයක් වඩා කලක්

එකම මග ගමන් ගත්තෙමි

දින සති මාස අවුරුදු ගණන්

ගෙවෙන බව නොදැනම තුමු

උගත්තෙමි ලැබගත්තෙමි බොහෝ

ශිල්ප ශාස්ත්‍ර අත්දැකීම් ගොන්නක්

වෘත්තීයභාවය නිතැතින්ම ලැබ ඇති

සුවිසල් ලොවක් මවා සිට සිත තුළ

කාලයාගේ අවෑමෙන් ගතට සිතටත්

වෙහෙසක් දැනෙන බව හැඟෙන කළ

යළි හැරී බලනු පිණිස කල් ගණින

ඵලක් නැති බව වටහා ගන්නෙමි නැවත

එක පිටට එක වැටෙන නිති නේක වැඩ

රාජකාරිය කියා පීඩනය ඇති උපරිමය

සීමාව ඉක්මවා පිනීමට ආසන්න ඇති

දරා ගැනුමත් ඉවසීමත් තමන් සතුවන

තුරුණු බව මැකී යන දින දිනම කල් ගතව

වුවද පරිණත බවත් එහි නොමැත බලයත්

වෙනසක් කෙරුම තැත් කළද විටෙකත්

නොවේ ඉන් පිළිතුරක් ගැටලු ඇත එලෙසින්

ක්‍රමවේද නොමැති කල නිසි ලෙසින් දක්වා

අවසාන ඵල ලබමි මානසිකව පීඩනයෙන්

පාලනය ගිලිහිලා හිසින් ගත වෙන් වූ විලස

අඳුරු වී යන කලට හාත් පස සියල් සිත්තම්

හැඟෙන දැනුනු විට පීඩනය ගත සිත දවන

රුචිය නම් හිමි නැතිය තවත් නම් සේවයට

හැර දා පලා යන්නට හැකි නම් මෙහි නොවී

සොයා සැනසුම සතුට නිදහස මුළු ලොවට

දොළොස් වසක සේවයට දැනේ වෙහෙසකර

නොහොඳ මිස නොව හොඳක් නම් අසන්නට

නව මං පෙත් සොයා පියඹා දොර හරින්නට

තෙහෙට්ටුයි දැන් ඉතින් කල් ඇතිව සමුගන්න 

---රකිත---

~~ මගට ~~

බැට කා කාලයාගේ අවෑමට

ඉක්මවා යමින් නිසි වයස්

වන්නට සිතූ අය වූ නොවී

බිඳ වැටි අපේක්ෂා භංගව

සිප් සතර නම් නොමැති තව

නොගැලපෙන කලට නිසි

අත් හැර කරමි තැත් නමට

ලබා ගනු වස් කිනම් හෝ දෑ

කල් ගතව සිටිනා කලට නම්

හිනැහේවි ලොවක් කියමින්

කිසිවක් නිසි ලෙස නොලැබූ බව

උපහාස අපහාසයන් මැද සිට

හිමි නොවූ සඳ තමන් හට තමන්

වන්නට හැකිද වෙනත් අයවලුන්

වැටහෙනා කල ඒ සියල් පාඩම්

පමා වැඩි බව දැනේ නිරතුරු

රැකියාව තත්ත්වය රැගෙන යන

කාර්යය නිති වන සංකීර්ණ ලෙස

නොහැක දරුමට තවත් නම්

පීඩනයකි නිතර සිත දවාලන රුදු

සිර කරන් ගත හැඟුම් දැනුමන්

දවා හළු කර දමා රුදු විලසට

නිහඬ කර හදවත නිරතුරුව සිට

උරුම නොවනා සොඳුරු ලොවකට

කඩවසම් රුව ධන බල තෙද නොමැති

කුමට නම් සිතුමට දෙසිතක බැඳුම්

නොකරමි ද්වේශයක් කිසිවෙකුට

මා නොලද දෑ උන් ලබන කල

කළ කී දෑ සැම එකතු වූ අතීතය

දෙස බලා වැළපෙනු කිමද අද

දිවි මග ඉතිරිව ඇති දුරක් යාමටද

කල් ඇතිය ඉතිරිව තවමත් අපට

ඉතිරි වූ යම් දෙයක් වේද එහි ඇති

රැගෙන රැකගෙන නිසි ලෙස එයත්

නිසි මගක ගමන් කර නියම ලෙස

වියුක්තව තරගෙයන් අන් දනන් හා

උරුමය ඇති තුමු වෙත සම්මත දෑ

පමණ ගත යුතු නිබඳ නිසි ලෙස

උගත යුතු දෑ තෝරා නිවැරදිව මින් මතු

ගමන් කළ යුතුය ගමන් මග නිමාවට

---රකිත---

~~ ජීවිතය-තම ~~

රිවි මඬල අවර ගිර 

එළිය කළ කලට වූ

නිමා කළ සේවාව 

පහේ කණිසමට තිත

පිටතට පැමිණි වුව 

වෙනසක් නොමැති

එකම චක්‍රයක ඇති 

සිරව ගොස් ජීවිතය

නොදැනීම කාලයා 

රැගෙන ගොස් තුරුණු ජීවිතය

මැදි වයස් සඟවන්න 

කෙසේ නම් තැත් කරන්නද

නූතන පරපුරක් අද 

අප පසු කරන් වේගයෙන්

ඇදේ නම් ඉදිරියට 

සාර්ථක ලෝකයට

දිවෙන්නට උන් සමග 

වරු නැත සිත ගතට

පසුවී සෙමින් පැමිණෙමි 

සම මගක නිසි ලෙසින්

ආලයට සෙනෙහසට 

කල් නොමැත දකින්නට

ඉකුත් වී ඇති සේම 

දැනේ ගත වයස් යන

පරිණතව සිටින්නට අපට

නොදැනේ පරිණත භාවයට

අවැසි තරමට නොවේවිද 

අත්දැකීම් ජීවන ගමනෙ

පෙර කළ කර්මයද 

දෛවයද මා ලැබූ

කළ කී දෑ නොවෙද 

පසුපසින් පැමිණෙන

සිහිනයන් ඇති නමුදු 

දිනෙන් දින දුරස් වන

පලක් ඇතිවාද තැවෙන්නට 

නොලැබූ දිවියකට මතු

හැකි විලස නිසි ලෙසින් 

යා යුතු මගම යමි සොඳින්

නොවේ ඇති තරගයක් 

අන් දනන් හා මෙතැන් සිට

මිනිස් කම පමණි ඇති 

අවසානයට වටින්නට තිබෙන

කළ හොඳ නරක පමණි 

ඉතිරිය අවසානයට ඇති

මතු භවක ලබන්නට

පතනා පැතුම් සිතුවිලිද

දෙව් මිනිස් සැප නිමවා

නිවන් සැප ලබන්නට

---රකිත--- 

~~ යථාවට නැවතත් ~~

 

 

හඹා ගියෙමි

සිහිනයක් පසුපස

අන්ධ වූ නෙතින්

බිහිරි වූ සවනතින්

 

නන් දනන් පැවසූ දෑ

නොසලකා සිට

මවා ගත් මායාවක්

පසු පසින් ගිය කළ

 

දින සති මාස අවුරුදු

අවෑමෙන් නිතර

එක් දිනක වෙහස කර

අවසානයක වූ

 

වැටහෙන්නට වූ

සඳ සැබෑ ලොවක තතු

දෙනෙත් විවර විය

යථා බව දැකුමට

 

නොගැලපෙන නොසැසඳෙන

කලට සිටිනා තැනට ඇති

වෘත්තියට දරා සිටුමට

දිවි මගට නිසි ලෙස

 

ලැබේවිද ශාස්ත්‍රාලයෙන්

ඉන් පිටුවහලක්

තරගකාරී ලොවක

ඉදිරියට යන්නට ගමන

 

තේරුම් ගෙන ඇතිව

වටහා ගතිමි නිසි ලෙස

වඩා සුදුසු වන

වෘත්තීය සුදුසුකම්

 

ජය ගැනුමට

දිවි මග නිසි ලෙසින්

ශාස්ත්‍රාලය වෙත

ගමන් කෙරුමට වඩා

 

එක් වැදගත් තීරණයක්

ගතිමි අද දින සිට

අත් හැරුමට ශාස්ත්‍රාලය

වෘත්තියමය නාමයෙන්

 

ඉගෙනුමට සැබෑ ලොව

සැබෑ ලෙස දකින්නට

ලබන්නට වෘත්තීය සුදුසුකම්

ඉගෙන සොඳින්

 

ඇතැමුන් සිනාසෙනු ඇත

නොහැකියාවම කියා

කුමන තැකුමක්ද

උන් කියනා වදන් හැම

 

තත්ත්වය නොවේ වන

හැකියාවම ජය ගනු නිති

කරමින් පාඨය ආදර්ශ ලෙස

උගනිමි මෙතැන් සිට

 

---රකිත---

~~ ජීවිතය නම් දැන් ~~

 

වසන්තය උදා නොවුනි දිවියට

පැන ගොසින් එය නෙතු මානයෙන්

තුරු ලතා ඵල බර නොවේ තවත්

මැලවී ගොසින් දුක්ඛිත ලොවට

 

චණ්ඩ හිරු රැස් අතර වළා නැති අහස් කුස

දූලි සුළි ගැසෙන උණුසුම් වායු ධාරා

වැහැරි වියළිව ගොසින් අප සැමත්

යොමා නෙතු හිස්වූ නුබ ගැබට

 

සිහින පෙන්නා රඟා දස්සන සියල්

උන් රැගෙන ගොස් ඇත අප පැතුම්

ලඝු කර අපේක්ෂාවන් සුළුතරයකට

සිර වෙලා බිමක අප සැමත් හිස් වෙලා

 

තුන් වේල දෙවේලට එක් වේල වන සැටිය

වැටුප් තනතුරු රථ වාහන නිවස වන සිහිනයන්

රාජකාරියත් සිමා වෙලා නිවසට දින ගණන්

විදුලි ජල ගැටලුවත් වී හරස් වන එයට

 

හාල් පරිප්පු කිරිපිටි සීනි පාන් පෝලිම් ඇතිව

ඖෂධත් අන් අහරත් වේය හිඟ දින දිනම

ඉන්ධනත් නොමැතිව රථ පෝලිම් ගණන්

යතුරු පැදියත් දැන් එක තැන මාසයකට වඩා

 

මඟුලට මරණයට යන්නට හැකියාව නැති

රෝහල් පාසල් වැඩපොළ වෙත යා නොහැකි

අවැසි සේවා තෝරා ගනු නම් කෙලෙසකද

සියල් අවැසිය රටක් ගෙනයන්න ඉදිරියට

 

පොදු ප්‍රවාහනය ඇතේ පිරී ඉතිරී ගොසින්

බස් දුම්රියත් දැනුත් ප්‍රමාණවත් නැති සැටිය

විදුලියත් නැති කලට වැඩ නැතිලු වැඩපොළේ

රැකියාව පවතීද යන්නත් ගැටලුවක් වේවිද

 

ත්‍රිවිධ හමුදා තැන තැන සිටියි ස්ථානගතවීද

මැදිහත් වේවි සිවිල් කටයුතු වෙත නිතර

ඇනුම් බැණුම් මැද ඉඳ හිට වදියි පා පහර

නොවදිද වෙඩි පහරත් හෙටත් උන් වෙතින්

 

වැටුප් නම් දැන් නොවේ වන්නේ ප්‍රමාණවත්

ගැට ගැසුමට දිවියත් එය තරම් නම් නොවේ

සිතුනත් යන්නට පිට රටකට සිට රිසියෙන්

වරම් නැත දැන් එයටත් හරස් වී ඇත රටක්

 

පල කෙරුමට අදහසක් ප්‍රත්‍යෙක මධ්‍යයේ

බිය දැනේ සිත පෙර වූ දෑ සිහි වෙන කලට

නිහඬ වෙමි දරා සියල් දුක සිතේ තද කරන්

සිට මරණයට බියේ තැති ගනිමින් ගැහෙමින්

---රඛිත---

~~ වැටහි යථා බව ~~

බොහෝ කල් ගතව ඇත

වෙනස් වී ඇත බොහෝ දෑ

සිරව එක් තැනක කලක්

දෑස් හැර බලමි ලොවක් දෙස

නොදැන ගිය කාලයට

මුවා වී වසත් කල

පැසෙන නර කෙස දකින

ලවනතත් වියැකි යන

පසු කරන් ගමන් මග පැමිණි

දුර ගොසින් අන් දනන් එහි

පමා වූ කල සැම දෙයට නිති

තරගයෙන් පැරද එහි

දහස් වදනින් කියන නේක දෑ

කෙසේ නම් කරම්ද වෙර නැතිව

ගැලපෙන නොගැලපෙන කමට

කෙසේ නම් ගනිම් අවදානමක්

එක් නිමේෂයක දැකි සිහින

බොඳව යන කලට සැම විට

වසත් කල කුමට එනු නම්

පමා වී වැඩි වූ දිනකදී

තත්ත්ව සහ කාර්යය දැකි ලොවට

මනුසත් කම් නම් කුමකටද

කාසි පනම් කළ නොහැකි කල

කුමට ගුණ දම් රකිනු අද

කළ කම් පල දෙනු ඇතැයි දෙසූ

දහම වලංගු මා හට පමණක්ද

සියල් අමන කම් කළ උන්ද

වැජඹෙනු කිම අදත් යහතින්

හුස්ම වැටෙනා කල් ඇතිව

හද ගැසෙන වාරයන් නිතර

වෙහෙස ගෙන දේ දෙනෙතටත්

ජීවන මඟ ලොව මැවූ තත්ත්වයක්

නවතින්න සිත් ඇතිය දිවෙනා තරගයෙන්

මුළු ලොවක් නැගුවා වුව දොසක්

ලොව සෑම දෙයට පොදු ඇති සීමාව

මට නොවෙද ඇති ජීවිත ගමනටත්

හැකියා මායිමේ නැවතුම ඇති

නොකළ හැකි දෑ නොකිරීම

රැකුමට ඇති අයිතියට හඬ නැගුම 

කියන් මට එය වරදක්ද

---රඛිත---

~~ සැනසුමක් නැති ~~

 

බොහෝ කල් දිවීමි 

සිහින පසුපස හඹා 

මග දිගු වනවා පමණි

එහි නැවතුමක් නැත

ගිමන් හැරුමට මදක් නැවතුමට

බැලූ කල සියල් හැල්මේ වේගයට

පසු කරන් මා ඉදිරියට යයි ඇදී

නැවතුමට ඉඩක් නැති බව කියා

හිස දරා ආතතිය ගත දරා වෙහෙසින්

ඉසිඹුවක් ලබන්නට සැනසුමක් මදක්

නැවතුමට සිත් දී තරගයෙන් ඉවත්ව

සිතුමට මතක් ආ ගමන් මග මෙතක්

සිප් සතර අසමත්ව පමා වූ විලස

රැකියාව එක් තැනක සිරව වූ ලෙස

මිල මුදල් ධන බලය නොමැතිව

එක් තැනක ඇත සිට තනිව ලොව

හිමි නොවන දෑ ඇතිය 

අහිමි වූ දෑ මහත්ය

කාලයා ගත වී ඇති සේය

එක් තැනක තනි වන්නටය

ඉතිරිව ඇත්තේ පවුල පමණකි

සවියට ඇත්තේ අද ඔවුන් පමණකි

යහළු යෙහෙළියන් අද කොහෙදෝ

සියල්ලන් ඇත ඔවුනොවුන්ගේ ලොවේ

යථා බව දරා සැබෑ ලොව දැක

වටහාගෙන ඇති තත්ත්වය ලැබූ

නිහඬවම වෙමි එක් පසෙකට

විසඳුමක් නොලැබෙනා සඳ

සිප් සතර අවසන් ඉලක්කය වූ

පැමිණ ඇත සියතට ගැනුමට

එය පමණි ඇත සැනසුම සිතට

අසාර්ථක වූ දිවියක කතාවට

තරගයේ නෙත් අඳ වූවා සේ

අවැසි නැත දිවුමට මින් පසු

මිරිඟුවක් සේ හැඟෙනා දිවියක

කුමට නම් ඇතිද තරගයක්

නිමා වූ දිනක සිප් සතර ඇති

අවැසි නැත ව්‍යාජයන් ලොව

සැනසුමක් සොයා දිවියේ ඉතිරියට

ගමන් කරමි යථා බව සොයාගෙන

---රඛිත---