ඔබ ගැන වදනක් අවදි කිරීම කෙසේ නම් සිදුකරම්ද කියා මා නම් නොදනිමි. මිතුර. විටෙක මිතුරෙකු ලෙසත් , සොයුරෙකු ලෙසත්, වගකීම් සපිරි වෘත්තිකයෙකු ලෙසත් ජීවන අරගලය සහ වෘත්තීය දිවියද සමබර ලෙස රැගෙන ගිය සාර්ථක මිනිසෙකු ලෙස ඔබ හැඳින්වීම වරදක් නොවේ.
දැනුම, අත්දැකීම්, නව චින්තන ධාරාව, විප්ලවීය වෙනසක් දැකීමට තැත් කළ, කලාත්මක සිතකින් මෙන්ම යථාර්තවාදී විද්‍යාත්මක චින්තනයකින් සන්නද්ධ වූ ඔබ වැන්නෙකු ඇසුරු කිරීමට තරම් අප සියල්ලන් වාසනාවන්ත වීමු.
සයිබර් අවකාශයේ අංකිත වදන් මතින් මතවාද, තර්ක විතර්ක, විවේචන මෙන්ම හදිසි ආපදා අවස්ථාවන් හි ඔබ නැංවූ හඬේ ප්‍රබලතාවය හා එහි බලපෑම ඔබ සතු නොසැලෙන ශක්තියක මහිමය පෙන්වූ කදිම නිදසුනක් විය.
ආයතනයට වටිනා මානව සම්පතක් වූත් ශ්‍රීලංකා මාතාවගේ පුත්‍රයෙකු වූත් අප සැමගේ ලබැඳි මිතුරෙකු වූත් ආදරණිය දසුන් සයුරෙන් එතෙර දූපත් රාජ්‍යකදී මෙලොව හැර යන්නේ සියල් නෙතට කඳුලක් එක් කරමින්ය.
ඔබ අප සියල්ලන් හැරගොස් අවසන්ය. මේ සොඳුරු මිනිසාගේ අවසන් ගමනට එක්වන්නට වරම් නැති මුදු ඔහු වෙනුවෙන් සයිබර් අවකාශයේ අංකිත සටහනක් තබමින් ඔහුට නිවන් සුව ප්‍රර්ථනා කරන්නමි.
“ඉතින් ආයුබෝවන් සොඳුරු දසුන් තරංග මිතුරාණෙනි” සසර වසනා තුරු මෙවන් විපතක් නුඹට කිසි ලෙසකින් අත් නොවේවා !
---රකිත---
