අසාපන් සොඳුරියේ
සොඳින් සිත
සවනත යොමා
මෙමා කියනා වදන්
ගොන්නට මදක්
සිතා බැලුමට
දුරට තවමත්
කල් ඇතිය නිසි
මගද තේරුමට
නුඹ හට
නැතිය පෙනුමක්
නම් පිළිගන්නා
ලොවක් මුහුණේ
හැඩට වැඩි
ශරීරයක් නොමැත
පතනා ලඳුන්
සම්මතව
ඇවිද යන හැඩය
ගැලපේද ඔබට
නොදන්නෙමි
නැත කාසි පනම්
ඉඩ කඩම්
යාන වාහන දේපළ
ඉහළ රැකියාවක්
ලොකු පඩියක්
තනතුරක් විසල්
පිළිගන්නා සම්මතයට
නොදන්නෙමි
තවදුරට ගැලපේද
නුඹට මම
නිරන්තර අන් අයවලුන්
තලන පෙළන සඳ
විහිළුවෙන් උන්
විනෝදයට
රිදව ගන්නා සිත්
සතන් නිතර
කන්තෝරුවේ
පංතියේ සැම කලට
සිතනු මැන තව වරක්
නුඹට මා ගැලපේද
ඉත සිතින් පිළිගනිමි
නුඹ පිදූ ආදරය
දනිමි නොලැබෙන
බවද තව වරක
මෙවැනි වරමක්
එනමුදුම පවසමින්
නැවත වතාවක්
සිතනු මැන සොඳුරියේ
යථාර්තය මැදින්
මා නුඹට ගැලපේද
---රකිත---