~~ කන්තෝරු මිතුරිය ~~

එකලු කර උදෑසන 

කාර්යාල පරිශ්‍රය

බිම් මහල වෙත ඇදෙන 

තුරුණු ඒ රුව දකින

ලැසි ගමන කඩිසරය 

බලන්නට සිත් දෙන්න

කුමරියක නාමය රැගෙන 

හිරු නොබැසි රටක ඇති

උදැසන සුභ පැතුම 

ස්වරය පිට යන කලට

වෙනස් වන වත කදිම 

ඇද වෙනා මුඛ හැඩය

වදන් තෙපලුමට පෙර 

පලා යන කලද තුමු

සිනාසෙන ඇය දකිමි 

අතින් ගෙන මුව වසා

හේතුවක් නොම නොදැන 

වෙනස් වන ස්වභාවය

වුවන වන ලෝහිත වර්ණ 

කෝප ගිනි දැවෙන්නා

රුදු වදන් බස කියනා 

ඉංගිරිසියෙන් පිඹ මුවෙන්

කම් නැතිය ඒ වදන් 

හෙළ දෙමළෙ බසින් නොවන

ඉඳ හිට පනින සීමාවක් 

රතු ඉරද කපා

බිණින වදන් ඇසුමට 

රුචි වේද අහෝ

කේන්තියත් රැගෙන 

නැගිට එන කල

කිසි දින ඔසවන බව 

නුදුටිමි සුරත ඇගේ

පවරන වැඩ රාජකාරිය 

ඉටු කෙරේ නිසි ලෙසින්

ඉඩක් නොමැත 

අතපසු වන්නට කිසිවක්

දකින දැනෙන විට 

අසාධාරණ කම තම වෙතට

පසු නොබසිනා 

ඇය නම් කදිමය නිතර

දුකක් ලෙඩක් කරදරයක් 

ඇති විට අපට

දිව එයි ඇයත් අමතක කර 

පෙර කහටත්

සොම්නස දොම්නස 

දරමින් එක සේ නිතර

කුමරිය ඇයයි සනසන 

අප හදවත් අතර

---රකිත---

~~ බිය කුරිරු අතර වන් ~~

වෙලා සිත බියෙන් කළ 

කුරිරු කම් උන් එක්ව

නින්ද නැත අහලකට 

නිදි නොමැති රැය ගෙවෙන

තියුණු අසිපත් රැගෙන 

වෙඩි සැරද සහයට රැගෙන

දැන් එතීයි උන් කියා 

දල්වා පපු ගින්දරක

ජාති ආලයෙන් පිරි 

ඔද වැඩිය දනන් කළ

අලාභය දහස් වේද 

පෑරුනු හදවත් සුව නොවන

වියරුව දෙවි නාමයෙන් 

එතිය උන් රංචුව ගැසී

පලා යනු වස් දොරටුව වසා 

සිතත් ගල් වී ලෙසින

කඩා බිඳ දමා ලද 

සියල් දහදිය කඳුළු

රැකි දේපළ නොවෙද 

අහිමි වී යන කලට

කළ කළ දෙය 

පල පල දේ කියන බණ

වලංගුව නැත තවත් 

දෙපස රඟනා උන්ට 

එදා එක පතක කෑ 

එකම මග ගිය උන්ට

නොමිනිසුන් වන්නකට 

කිමද කළ පව අපට

ලක් මවුන් තෙමන්නට 

රුහිරු කුමකට අපට

කඳුළු බිඳු මදිවාද 

හැලූ මිනිසුන් එදින

නොරැටියන් කැස කවන 

රඟන්නට මව් බිම පැමිණ

නොතේරෙනු කිමද අද 

මොළ ගෙඩිය ඇති කලඳ

සූරා කා සියල් සම්පත 

නොයිඳ උන් එතන

කරනු ඇත අතවරය 

ලක් මවුන් වන කිලිටි ලොව

වැරදි ඇත කා අතත් නොවේ 

එනමුදු නීතිය නුඹට

අතට ගෙන රඟන්නට 

තොපිට වන් නැතිව

බලධාර නිල දරුවො 

කරනු ඇත යුක්තියට

අධිකරණ බල තලය 

පසිඳවයි සාධාරණ සැමට

ඉවසා වදාරා සිටිමු 

ඉඩදී කාලයට

විසඳාවි සියල්ලක් 

ඕ තොමෝ අවෑමෙන්

බුදුනී ජේසුනී අල්ලා දෙවිඳුනී

කරවනු මැනවි සමගිය 

පෙර කලක සිටි මෙන් 

අප සැමට සැනසුමට

---රකිත---

~~ පැතුම් / ආවර්ජනා ~~

ඉක්බිතිව දෙසතියක් ගෙවී ගිය කාලයක්

මර බියෙන් සලිතවී දිවි ගෙවූ කාලයක්

කෙලස කරමුද අමතකව සිට ඒ කාලයක්

නිති නිතර සිහි කරමු ඒ රුදුරු කාලයක්

දෙව් සමිඳු අබියසක පාස්කු දින කළ යැදුමකින්

අතර පිපිරුම් මතින් කළ ලෙයින් තෙත් කරන්

සිය ගණන් ජිවිත රැගෙන ස්වර්ගය වෙත අරන් 

දෙව් පුතුන් දකින්නට ඒ දනන් කළා වූ පිං කඳින්

කිතු හදවත් නොව පමණ බොදු හදත් සලිතව

එක්ව නැගු සෝ සුසුම් ලොවම කර කම්පිතව

පෙර කලක දැනුනු බියමද යලි දැනෙනා බව

බියපත් සිතින් වන්නට කල් සැමට ගත කරව

සැත්තෑ දෙකක් සොයා කන්‍යාවියන් දෙව් ලොව

උදුරා දිවි සිය ගණන් උන් ලබනා පව මේ ලොව

ගොස් මරු තුරුලට ඒ නරයන් යනවා යම ලොව

පැසී විඳිනු ඇත කල්ප ගණනින් කළ පව් ඒ ලොව

රණ විරු තබා පරදුවට දිවි සොයා ත්‍රස්ත රැල

බණ මඩුව විවර විය ඉරුදින දෙව් යැදුමට කල

මෙත් පතුරුවනා ඒ පිරිපුන් ධර්මයන් දෙපල

රැකි සමගිය කිතු බොදු දෙමින් පාඩමක කළ

දන් දෙනු වස් රුධිරය අවැසි වූ දනන් වෙත

පෙළ ගැසි කිතු බොදු තුරුණු කැළ වූ සමත

සුදු කොඩි නැගුණු පන්සල් පල්ලිය වෙත

උන් දත් කන්නට ඇත නරඹා සමගිය වෙත

වෙසක් පොසොන් විය අවලංගුව පළමු ලෙස

රැක නිල දරුවන් කිතු බොදු පුද බිම් ඒ විලස

පාස්කුවට නැති වෙසක් අවැසි නැති ලෙස

නිහඬව සමරමු තෙමඟුල එක් වී හැම මේ වස

කිතු පුද බිම් නොව බොදු පුද බිම් වැනසුමකට

අර ඇදි බව දැනුමට ලැබි දිවි දුන් කිතු බැතියට

එක්වී පිං දෙමු පහනින් ඉටි පන්දම් දල්වා සිට

කිතු යැදුමෙන් බොදු පිදුමෙන් අප එක්වී සිට

රුදු අසිපත් සිය ගණනින් මතුවන කල

පිපුරුම් සැලසුම් හෙළිවෙන විට කල

ඉවසුම් කදිමයි කිතු බොදු දන සැම කල

මෙත් වඩා ප්‍රේමය වඩමු දරා බාධක එකල

කිතු බොදු සැමරුම් වෙන්වී කළ තරමක් කල්

එක්වී සමරමු අප මින් පසු සැම එකමුතුවෙන්

ස්වර්ග මෝක්ෂය නිවනට අප මතු සසරෙන්

එක්වී යමු අප සැම එහි එක පවුලක් විලසින්

බුදු සරණයි ! ජේසු පිහිටයි !

---රකිත---