නිමිත්ත - පාසැල් යන වයසේ අත්වැරැද්දක් වී ඇති ඇය නුඹ බාර ගන්නේද?
සොයා පෙර වැරද්දක්
කළ හැඟුමකින් එක්ව
පිරුවටක රැඳි රුධිර
බිඳු සොයන පිරිමිකම
ඉකි බිඳින මනාලිය
මධු දිනක වගුරා කඳුළු
මනිනු කිම පතිවතක්
කිළුටු වූ රෙදි කඩින්
සොයා යන තැනින් තැන
පිනූ කල අතින් අත
තුරෙන් තුර මාරු කළ
පිරිමි කම වසත් කල
සොයා පිවිතුරු කමක්
යුවතියක දීග ගිය
බිණියි වදනින් පෙළක්
සිත් හදත් පාරවා
නුඹට ඇති සම අයිතියක
ඇයට ඇතිවා නොවෙද
ඉදිබුවෙකු සේ රිංගවා
සංස්කෘති කටු තුළට
යහන මත තලා ඇති
මල් කැකුළු කොපමණද
වීරයෙකු කියයි ඔහු
මේ කුරිරු සමාජය
රුහිරු බිඳු කෙලසකද
රකිනු පතිවතක් සිත
හදවතක පතුලකින්
නැගෙන හැඟුමක් නොවෙද
උරුම වන්නට දිවිය
ඇය පතන සොඳුරු ලොව
කිම්ද අද කර අහිමි
පිරුවටය මුවා කර
ආලයේ සොඳුරු තැන්
සොයා යන තුරුණු කම
උරුම නුඹටම පමණක්ද
ඇය තලා පෙළනා සැටිය
වසත් කල සොයා යන
දිවි මගක සොඳුරු දින
නොකරනු මැනවි අසුබ
කිළුටු ලෙස පවසමින
රහස් ඇත රකින්නට
දිවි ඇති තුරා සෙනහසින්
නොතෙපලා සිටිනු මැන
අතීතය අඳුරු කළ
ගෙන එන්න මුවගටත්
ඇය සිනා පාන්නට
රකිනු මැන ඇය නුඹේ
නෙතු සඟල ලෙස කදිම