සියලුම පිරිසිදු සේවා හි නියුතු සේවක සේවිකාවන් වෙනුවෙනි

අරුණ වැටෙනු පෙර අවදිව හිමිදිරි 

ඒමට ඇත හිරු කිරණක් නොදකින 

සුදානම් විය යුතු අද දවසට මේ ලෙස 

එමටම ඇත වැඩ ගොඩ නම් සිතු ලෙස 

මේසය පුටුවද ඇත නම් නිරතුරු 

රැඳුමට ඉඩ නැත වැඩ ඇත එමටම 

සුළු වැඩ බර වැඩ අමතර ඒ වැඩ 

පදමට ඇත පැය අටටත් වැඩි සඳ 

මේස පිහන අතු පතු ගානා වැඩ 

තේද වතුර අහරද බෙදනා වැඩ 

වැසිකිලි කැසිකිලි පිරිසිදු කරනා වැඩ

දවස ගෙවෙයි දහදිය වගුරාගෙන   

සර් මැඩම් මිස් කියා නැමෙනු ඇත 

කොන්ද කෙලින් නැතුවා අද දවසට

ඇනුම් බැණුම් ගැරහුම් නම් අඩු නැති 

හොඳක් අසන්නට නම් ඒ ඉඩ නැති  

ඉඳ හිට පැමිණෙන ලොක්කන්ගේ ඇති 

ඝනකම ගෙරවුම් බර වදනින් ඇති 

වැඩ මදි තව නම් අවැසිය කඩිසරකම් 

පැමිණිලි නම් ඇත ඇගයුම් නම් නැත  

දිවා රෑ නොබලා වෙහෙසට පත්වන 

පැය අට නොව දොළොසක් අද වෙහෙසන 

නිරතුරු ශ්‍රම බල සූරා ගෙන කන

තුට්ටු දෙකක් ඇත සැම මස අගටම 

කොස්සට ඉදලට බිම පිසිනය වෙත

පිඟන් කොප්පද තේ රොඩු බොඩු වෙත 

මහ මග ගොඩ ගැසි කුණු කඳු රැළි වෙත 

පමණද අපගේ දිවියේ අයිතිය වෙත   

රතු ඇඳිවත ඇඳි නෝනලා මහතුනි

අප දුක නොදකිනු මන්දැයි නොදනිමු

අයිතිය නොමැතිද අප හඬ නැගුමට  

අහිමිද අප හට ඔබ පන්තිය නිර්ධන

---රකිත--- 

පැරණි මතක / තනිකම / මැද ?

තනි වී ඇත සිත නිවාඩු දින මැද  

කිසිවෙකුවත් නැත වදනක් පවසන්නට

නිහඬව ඇත දුරකථන මුහුණු පොත 

කෙතරම් කුරිරුද තනිකම විඳවන්නට 

නුබ ගැබ අඳුරුය වැහි බීරුම ඇත 

සිසිලක් නොදැනේ තනිකම රිදවන්නට 

මිතුරන් ඇති මුත් හමුනොවෙනා සඳ 

කුමන කරුමයද මෙලෙසින් තනිවන්නට 

කවි සිතුවිලි නැත ගෙත්තම් කෙරුමට 

රුදු විභාගයක් ඇත හිත වද දෙන්නට

මුදු වදනින් ඔබේ සුභ පැතුමන් නැත 

කෙසේ උසුලම්ද සිතේ දුක් ගින්න 

පෙර දිනයක ලෙස එනු මැන මා වෙත 

අතිනත ගෙන පිය මැනුමට මග වෙත 

සිනහව පිරි මුදු වදනින් මා වෙත 

දෙනු මැන ඔබගේ සුභ පැතුමන් මා වෙත 

සිහිනෙන් පමණක් ඔබ රුව දකිමින්නේ  

සිහිනෙන් පමණක් ඔබ හඬ අසමින්නේ 

සිහිනෙන් පමණක් ඔබ සිනහා මවන්නේ 

සිහිනෙන් පමණක් ඔබ හා එක් වන්නේ  

අහස අඳුරු කළ වැහි බීරුම මැද 

දිනයක යමු අපි අතිනත් බැඳ ගෙන

යලි හමුවන්නට පෙරුම් පුරමු අපි 

එතෙක් හිඳිමු අපි දෙපසට වී අද 

---රකිත---

ගෙවුනු වසර / නව වසර ??????

උඳුවප් මස සීත සුළං ගත දැවටෙන විට සුව දෙන 

සිහි වෙයි පෙර දිනයක මා ඔබෙන් ලැබූ ප්‍රේම සුවය 

තුරු අතු අතරින් ඇදෙනා සිලි සිලි හඬ ඇසෙනා විට 

සිහි වෙයි පෙර දිනයක මා ඔබෙන් ඇසූ ප්‍රේම වදන් 

කිසිවෙකු නැත අද දිනයේ තනිකම පමණයි ඇත්තේ 

හුදකලාව මේ තරම්ම කුරිරුද අසනු මැනවි මා මිතුරේ 

මවත් සොහොයුරන් දෙපලත් පමණයි සැනසුම දෙන්නේ 

ඉගිලී යන්නේ කෙදිනද මිතුරේ අලුත් කූඩුවක් තැනුමට     

දින සති මාසද අතරින් වසරක් ගෙවිලා යන කල 

උරුම වේද විඳගන්නට ජිවිතයේ සොඳුරු පහස  

දෑත් බැඳන් එක් වෙන්නට වසන්තයට අත වනන්න

උදා වෙන්නේ ඒ කාලය සිහිනෙන් පමණද මිතුරේ

සිහින දකිමි ආදරයක උණුසුම සිත් සේ විඳුමට 

දුකම පමණි හිමි වන්නේ කඳුලක සීතල විඳුමට 

දෙවය මෙතරම් සරදම් කරමින් කිමදෝ විඳුමට    

උරුමය කරුමය පමණද දිවියම මෙලෙසින් විඳුමට 

සැනසුම කවදත් හිමි නැති විඳවුම පමණක් හිමි ඇති 

අපහසයද උපහාසයද ඇනුම් බැණුම් ගෙරවිලි මැද 

තනිකම පාළුව දුක මැද ගෙවී යන්න තව වසරක් 

උදා වේවි දින අතරින් ඉතිරිව ඇති දින දසුනේ

---රකිත---   

හමුවෙමුද යළිත්

හමුවන්න එක් වරක් තව 

කැලණි සරසවි පිං බිමේ 

එනු මැනවි සොඳුරියේ 

සුපුරුදු ඉරු දින උදයේ 

ප්‍රේමයෙන් නොව එදින 

මිතුරියක් සේ තුටින 

මතක සයුරේ ගිලෙමු 

පුරුදු බංකුවේ හිඳ 

දින සති මාසයන් මැදින් 

ගෙවුණු වසරක පහස 

විඳිමු සතුටින් එදින 

සිහිල් මද පවන් මැද 

සති අගට එක් දිනක් 

උරුම සරසවි දිවිය 

ලබන්නට පිං ලැබුණි 

ඔබේ රුව දකින්නට        

වරම් නොතිබුණි ලඳුනි 

ඔබට පෙම් බඳින්නට 

හරස් විය වේල පත්කඩය 

දෙගුරුන්ට කීකරුව

තවත් එක් වසරක්ම දැන් 

තනිව ඉතිරිව ඇත මෙමට 

රැඳෙන්නට සරසවි බිමේ 

උසස් අධ්‍යාපන ලබන්න

නව වසරෙ ඔබ නොමැත 

හමුවන්න මින් මතුව 

කෙසේ නම් හැර යම්ද 

ප්‍රථම සරසවි පෙමද  

ඉඩ දෙන්න එක් වරක් 

ඔබේ අත ගෙන තුටින් 

ඇවිද යන්නට මෙදින 

සොඳුරු සරසවි බිමේ 

---රකිත--- 

දුක / කලකිරීම

උගත්තෙමි දහතුන් වසක් - සොඳුරු පාසැල් වියේ

උගත්තෙමි තව සිවු වසක් - සොඳුරු සරසවි පියේ

උගත්තෙමි දෙවසක් තවත් - සොඳුරු සරසවි පියේ

දැන උගත්තෙමි ඉහළටම - දිවි ගමන් මග මෙසේ

පළමුවම ලැබගතිමි රැකියාව - විධායක ශ්‍රේණියේ

දෙවනුව ලැබ ගතිමි ගෞරවය - සේවා ස්ථානයේ

තෙවනුව ලැබ ගතිමි අත්දැකීම් - ඉහළ පන්තියේ

සිතුවෙමි ජය ලැබුමට මෙලෙස - මේ සුභ දිවියේ 

ඇඳ පැළඳ ජේත්තුව - ගමන යන සේවයට

සිරව ඇත මේසයට - රුදු අට පැයක සේවයට

අක්‍රෝෂ පරිභවද - ඉඳ හිට අගයක් අසන්නට

සැනසුමක් නැතිද ලොව - විඩා සිත් නිවන්නට

සෑමදා යනෙන සඳ - දැනෙයි සෙක්කුවක හැඩ

ආදරෙන් බැඳෙන්නට - නැතිද කාලයක් හැඩ

මිතුරු මිතුරියන් මැද - හිඳුමට කලක් නැති හැඩ

කෙසේ නම් ඉවසමිද - කිසිවක් නොලැබෙනා හැඩ 

වැටුප අත පිරෙන්නට - ගිණුමෙහි ඇති නමුදු

ඇඟලුම්ද පැළදුම්ද - අලංකෘතව ඇති නමුදු

මුදු වදන් රූසපුව - සැනසෙන්න ඇති නමුදු

සැනසුමක් නැත කිමද - සිත් සයුර තුළ නමුදු

නිබඳ පැතුවෙමි වෙනස - දිවි ගමන සොඳුරු ලෙස

නිබඳ පැතුවෙමි පහස - ආලයක සොඳුරු ලෙස

නිබඳ පැතුවෙමි සුභම - පැතුමන්ද සොඳුරු ලෙස 

නිබඳ පැතුවෙමි කඳුළු - නොනැගෙන්න මේලෙස   

රුදු අඳුරේ එලියක්ව - දිලෙන්නට පැතුව මුදු

ඒ අඳුරෙ ගිලෙන්නට - සිදුව ඇත මේ සුමුදු

සැනසුමක් දකින්නට - පැමිණි මුත් ඒ නමුදු

වැලපුමක් පමණක්ය - දිවිගමන මේ රුදුරු

හසරැලක් නැති ලොවක - කුමන සුභ දිවියක්ද

නිදහසක් නැති ලොවක - කුමන සුභ දිවියක්ද

සැනසුමක් නැති ලොවක - කුමන සුභ දිවියක්ද

දුක කඳුළ ඇති ලොවක්  - සැබෑ  සුභ දිවියක්ද

---රකිත---     

සරසවි නිමවා උසස් රැකියාවක් ලැබුණු සොයුරියකගේ ඉල්ලීමක් අනුව නිර්මාණය කරන ලදී 

වැඩ මැද සැනසුම

කවි සිත නිදි ඇත 

වැඩ නම් ගොඩ ඇත

ව්‍යාපෘතියක් ඇත  

පැවරුම් නම් ඇත 

විභාග ලඟ ඇත 

පාඩම් ගොඩ ඇත 

නිදි වැරුමන් ඇත 

නොසන්සුන්ව ඇත 

සිත සැනසුම් නැත 

ගත සැනසුම් නැත 

නෙත් සැනසුම් නැත 

දිවි සැනසුම් නැත 

අදර වරම් නැත 

සතුටක් නම් නැත 

වැඩ නිමවන් නැත 

වේලාවක් නැත 

තුටින් හිනැහෙන්න 

ගතින් නැලවෙන්න 

සිතින් සැනසෙන්න 

හොඳින් සැතපෙන්න 

කලක් නම් එන්න 

දුරුතු මස පසුවන්න 

සිහින සැබ වෙන්න 

පතමි සුභ වන්න 

---රකිත---