විහිදුවා සුගන්ධය පැතිර
දසතින් විදී ලොව මත
විකසිතව කැකුළු මල
රුව පැහැ දිදී දිලෙනා
වර්ණවත් වූ ලොවක නව
සිහින පොඩි බැඳන්
නුඹත් හිනැහෙන්න ඇති
දහසක් පැතුමන් අරන්
ඇදී කුසුමට වශී වී ඇති
බඹරිඳුට නුඹ වූවා මනාපය
බැඳෙන්නට ඇති සෙනෙහෙන්
ඔහු නුඹට බැඳි පෙමෙන්
නාද දුන් ඒ රටාවන් පෙළ
ආලයෙන් පිරි මකරන්දය
පුදා නිබඳව රැකද පතිවත
සිනා ගැන් වූ ලෝකයේ
මත් බඹරු සොයා පියඹනා
මලින් මලට නිති
නුඹත් වූ සඳ එක් මලක්
තවත් එක් බඹරෙකුට
තලා නොදැමූ වුව පෙති කුසුමක
මකරන්ද රස නොබැලූ මුත් ඇගේ
පෙළා තලා දැමූ හද වේදනා දෙනා
ඉගිල ගිය බඹරිඳු සඳ සිත් පිත් නැති
පිණි බිඳු සේ ඇදහැලෙන
කඳුළු කැටි පිසලුමට වරම් නැති
හිස හොවා හඬන්නට සැනසුමට
උර දෙන්න වරම් නැති
තුනී කරනු වස් නුඹ විඳින
ඒ දුක්ඛ දෝමනස්සය
කෙලෙසකින් ලඟා වම්ද
ලොවක් කියනා දෝස
ඇත යන්න දුර ගමන
නුඹට තව කල් තිබෙන
දැඩි කරන් සිත මදක්
වෙර දරනු නිතැතින්ම
හකුලුවා පෙති මලක
වී කැකුළු මල් විලස
විකසිතව හිනැහෙන්න
නව දිනක පිපී නැවත
---රකිත---