~~ සොඳුරු සන්නාලිය ~~

ඇසුරු සැණින් සළු පට 
මත මැවෙනා
ඉඳි කටු තුඩු අග 
සුසංයෝග වූ
වර්ණ රටා පිරි 
හැඩ තල නිමවන්නා
සියුමැලි දෑතින් 
විස්කම් කරනා 

ලාබ පවහන ලබයි ඔබ 
සුසිනිඳු දෙපා පහස
ලෝහ පැදිය තෙරපා 
බල කවා යන්ත්‍රයට
යොමා නෙත සළු මතට 
පියකරු වන්නට
ඇය වේද යුවතිය 
වියනා රටාවන් දිවිය

හමනා විලවුන් සුගඳ වුව 
යටවනා දහවල සැරට
හැඩ වැඩ නැති ඇඟලුම් වේ 
ගත විලි වැසේනා 
විච්චූරණ පිරි 
විසූක දස්සන පෙළ
හිමි නැති ඇය වෙත 
දුටිනෙමි මහ මග

පිරිවරා මිතුරියන් සවස් කල 
වැඩ නිමා කර
මියුරු හඬ අවදි කර 
මිහිර ගෙන සවනතට 
නවාතැන් පොළ වෙත ඇදෙන 
රැගෙන අඩුම කුඩුමද
කුමරියක සේ පෙනේ ඔබ 
මිහි බට රජ මැදුරකින්

දිළිඳුකම සිප් සතර 
නොලැබුම නැණ නුවණ
නුඹ නතර වීද අද 
කලාපය අද්දරට
ගැරහුම් උපහාසයන් 
මුළු ලොවක් එල්ල කරනා
දරණ ඒ සියලු දෑ 
සිනාවෙන් පිරි වතින්

විස්කම් මවන රන් දෑත 
නුඹ දරණ මව් බිමේ
ගෙනෙන ධන බල 
සශ්‍රීක බව නිතර
දිරිය දියණියකි නුඹ 
රට රකින නිහඬව සිටින
පුදමි හද අද ඔබට 
රහසින්ම නොදන්වා

---රකිත---