~~ යථාවට නැවතත් ~~

 

 

හඹා ගියෙමි

සිහිනයක් පසුපස

අන්ධ වූ නෙතින්

බිහිරි වූ සවනතින්

 

නන් දනන් පැවසූ දෑ

නොසලකා සිට

මවා ගත් මායාවක්

පසු පසින් ගිය කළ

 

දින සති මාස අවුරුදු

අවෑමෙන් නිතර

එක් දිනක වෙහස කර

අවසානයක වූ

 

වැටහෙන්නට වූ

සඳ සැබෑ ලොවක තතු

දෙනෙත් විවර විය

යථා බව දැකුමට

 

නොගැලපෙන නොසැසඳෙන

කලට සිටිනා තැනට ඇති

වෘත්තියට දරා සිටුමට

දිවි මගට නිසි ලෙස

 

ලැබේවිද ශාස්ත්‍රාලයෙන්

ඉන් පිටුවහලක්

තරගකාරී ලොවක

ඉදිරියට යන්නට ගමන

 

තේරුම් ගෙන ඇතිව

වටහා ගතිමි නිසි ලෙස

වඩා සුදුසු වන

වෘත්තීය සුදුසුකම්

 

ජය ගැනුමට

දිවි මග නිසි ලෙසින්

ශාස්ත්‍රාලය වෙත

ගමන් කෙරුමට වඩා

 

එක් වැදගත් තීරණයක්

ගතිමි අද දින සිට

අත් හැරුමට ශාස්ත්‍රාලය

වෘත්තියමය නාමයෙන්

 

ඉගෙනුමට සැබෑ ලොව

සැබෑ ලෙස දකින්නට

ලබන්නට වෘත්තීය සුදුසුකම්

ඉගෙන සොඳින්

 

ඇතැමුන් සිනාසෙනු ඇත

නොහැකියාවම කියා

කුමන තැකුමක්ද

උන් කියනා වදන් හැම

 

තත්ත්වය නොවේ වන

හැකියාවම ජය ගනු නිති

කරමින් පාඨය ආදර්ශ ලෙස

උගනිමි මෙතැන් සිට

 

---රකිත---

~~ ජීවිතය නම් දැන් ~~

 

වසන්තය උදා නොවුනි දිවියට

පැන ගොසින් එය නෙතු මානයෙන්

තුරු ලතා ඵල බර නොවේ තවත්

මැලවී ගොසින් දුක්ඛිත ලොවට

 

චණ්ඩ හිරු රැස් අතර වළා නැති අහස් කුස

දූලි සුළි ගැසෙන උණුසුම් වායු ධාරා

වැහැරි වියළිව ගොසින් අප සැමත්

යොමා නෙතු හිස්වූ නුබ ගැබට

 

සිහින පෙන්නා රඟා දස්සන සියල්

උන් රැගෙන ගොස් ඇත අප පැතුම්

ලඝු කර අපේක්ෂාවන් සුළුතරයකට

සිර වෙලා බිමක අප සැමත් හිස් වෙලා

 

තුන් වේල දෙවේලට එක් වේල වන සැටිය

වැටුප් තනතුරු රථ වාහන නිවස වන සිහිනයන්

රාජකාරියත් සිමා වෙලා නිවසට දින ගණන්

විදුලි ජල ගැටලුවත් වී හරස් වන එයට

 

හාල් පරිප්පු කිරිපිටි සීනි පාන් පෝලිම් ඇතිව

ඖෂධත් අන් අහරත් වේය හිඟ දින දිනම

ඉන්ධනත් නොමැතිව රථ පෝලිම් ගණන්

යතුරු පැදියත් දැන් එක තැන මාසයකට වඩා

 

මඟුලට මරණයට යන්නට හැකියාව නැති

රෝහල් පාසල් වැඩපොළ වෙත යා නොහැකි

අවැසි සේවා තෝරා ගනු නම් කෙලෙසකද

සියල් අවැසිය රටක් ගෙනයන්න ඉදිරියට

 

පොදු ප්‍රවාහනය ඇතේ පිරී ඉතිරී ගොසින්

බස් දුම්රියත් දැනුත් ප්‍රමාණවත් නැති සැටිය

විදුලියත් නැති කලට වැඩ නැතිලු වැඩපොළේ

රැකියාව පවතීද යන්නත් ගැටලුවක් වේවිද

 

ත්‍රිවිධ හමුදා තැන තැන සිටියි ස්ථානගතවීද

මැදිහත් වේවි සිවිල් කටයුතු වෙත නිතර

ඇනුම් බැණුම් මැද ඉඳ හිට වදියි පා පහර

නොවදිද වෙඩි පහරත් හෙටත් උන් වෙතින්

 

වැටුප් නම් දැන් නොවේ වන්නේ ප්‍රමාණවත්

ගැට ගැසුමට දිවියත් එය තරම් නම් නොවේ

සිතුනත් යන්නට පිට රටකට සිට රිසියෙන්

වරම් නැත දැන් එයටත් හරස් වී ඇත රටක්

 

පල කෙරුමට අදහසක් ප්‍රත්‍යෙක මධ්‍යයේ

බිය දැනේ සිත පෙර වූ දෑ සිහි වෙන කලට

නිහඬ වෙමි දරා සියල් දුක සිතේ තද කරන්

සිට මරණයට බියේ තැති ගනිමින් ගැහෙමින්

---රඛිත---

~~ වැටහි යථා බව ~~

බොහෝ කල් ගතව ඇත

වෙනස් වී ඇත බොහෝ දෑ

සිරව එක් තැනක කලක්

දෑස් හැර බලමි ලොවක් දෙස

නොදැන ගිය කාලයට

මුවා වී වසත් කල

පැසෙන නර කෙස දකින

ලවනතත් වියැකි යන

පසු කරන් ගමන් මග පැමිණි

දුර ගොසින් අන් දනන් එහි

පමා වූ කල සැම දෙයට නිති

තරගයෙන් පැරද එහි

දහස් වදනින් කියන නේක දෑ

කෙසේ නම් කරම්ද වෙර නැතිව

ගැලපෙන නොගැලපෙන කමට

කෙසේ නම් ගනිම් අවදානමක්

එක් නිමේෂයක දැකි සිහින

බොඳව යන කලට සැම විට

වසත් කල කුමට එනු නම්

පමා වී වැඩි වූ දිනකදී

තත්ත්ව සහ කාර්යය දැකි ලොවට

මනුසත් කම් නම් කුමකටද

කාසි පනම් කළ නොහැකි කල

කුමට ගුණ දම් රකිනු අද

කළ කම් පල දෙනු ඇතැයි දෙසූ

දහම වලංගු මා හට පමණක්ද

සියල් අමන කම් කළ උන්ද

වැජඹෙනු කිම අදත් යහතින්

හුස්ම වැටෙනා කල් ඇතිව

හද ගැසෙන වාරයන් නිතර

වෙහෙස ගෙන දේ දෙනෙතටත්

ජීවන මඟ ලොව මැවූ තත්ත්වයක්

නවතින්න සිත් ඇතිය දිවෙනා තරගයෙන්

මුළු ලොවක් නැගුවා වුව දොසක්

ලොව සෑම දෙයට පොදු ඇති සීමාව

මට නොවෙද ඇති ජීවිත ගමනටත්

හැකියා මායිමේ නැවතුම ඇති

නොකළ හැකි දෑ නොකිරීම

රැකුමට ඇති අයිතියට හඬ නැගුම 

කියන් මට එය වරදක්ද

---රඛිත---

~~ සැනසුමක් නැති ~~

 

බොහෝ කල් දිවීමි 

සිහින පසුපස හඹා 

මග දිගු වනවා පමණි

එහි නැවතුමක් නැත

ගිමන් හැරුමට මදක් නැවතුමට

බැලූ කල සියල් හැල්මේ වේගයට

පසු කරන් මා ඉදිරියට යයි ඇදී

නැවතුමට ඉඩක් නැති බව කියා

හිස දරා ආතතිය ගත දරා වෙහෙසින්

ඉසිඹුවක් ලබන්නට සැනසුමක් මදක්

නැවතුමට සිත් දී තරගයෙන් ඉවත්ව

සිතුමට මතක් ආ ගමන් මග මෙතක්

සිප් සතර අසමත්ව පමා වූ විලස

රැකියාව එක් තැනක සිරව වූ ලෙස

මිල මුදල් ධන බලය නොමැතිව

එක් තැනක ඇත සිට තනිව ලොව

හිමි නොවන දෑ ඇතිය 

අහිමි වූ දෑ මහත්ය

කාලයා ගත වී ඇති සේය

එක් තැනක තනි වන්නටය

ඉතිරිව ඇත්තේ පවුල පමණකි

සවියට ඇත්තේ අද ඔවුන් පමණකි

යහළු යෙහෙළියන් අද කොහෙදෝ

සියල්ලන් ඇත ඔවුනොවුන්ගේ ලොවේ

යථා බව දරා සැබෑ ලොව දැක

වටහාගෙන ඇති තත්ත්වය ලැබූ

නිහඬවම වෙමි එක් පසෙකට

විසඳුමක් නොලැබෙනා සඳ

සිප් සතර අවසන් ඉලක්කය වූ

පැමිණ ඇත සියතට ගැනුමට

එය පමණි ඇත සැනසුම සිතට

අසාර්ථක වූ දිවියක කතාවට

තරගයේ නෙත් අඳ වූවා සේ

අවැසි නැත දිවුමට මින් පසු

මිරිඟුවක් සේ හැඟෙනා දිවියක

කුමට නම් ඇතිද තරගයක්

නිමා වූ දිනක සිප් සතර ඇති

අවැසි නැත ව්‍යාජයන් ලොව

සැනසුමක් සොයා දිවියේ ඉතිරියට

ගමන් කරමි යථා බව සොයාගෙන

---රඛිත---

~~ බිය කල් වූ ~~

සිතක් බියපත්ව 
සොයයි සැඟවෙන්න
තැනක් තනි වන්න 
මුවා වී ලොවට

තර්ජන ගර්ජන පෙළට
පැමිණි සැකයට සිතට
දිවිය රැක ගනු වස් 
පැන යන්න හැකිවේද

සිතට ආ වේගයට 
තත්‍යාසන්න අවකාශයක
අකුරු කළ වරදකට 
වැටහෙන්න පමාවූ

නිල ඇඳුම් ලා රට රකින
ත්‍රිවිධ හමුදා පොලිස් නිල දරු
සිතක් රිදුනාද ඔබ සැමට
පවුල්වල අයවලුන් සමගද

ඉවත් කළ මුදු සියල් දෑ
රුදුරු දුදනන් රැඳී සිටි මෙහි
සැන රූ රැගෙන ඒ සැණින්
ප්‍රසිද්ධ කළා වුන් අවකාශ තුළ

අපහාස උපහාස ගැරහුම් තර්ජන
වැදූ මව්න්ටත් කියනා නොරසුප් වදන්
තුමු රුව ගෙන බෙදා හැර උන්
කරනා මරණ තර්ජන තුටින්

පලා යන්නට මගක් නැත 
සැඟවී ගොස් තත්‍යාසන්නයෙන්  
කලක් ගතවී ඇති නමුදු 
බිය නොමැත පහව ගොස් ඇති

සැබෑ මිතුරු මිතුරියන් 
පැමිණ සිත් සනසාලමින්
ඇතැම් අයවලුන් ලොකු අතු 
සොයා මා රකින්නට වැර දරා

ඉතිරි වී ඇති පල කෙරුම් 
තවත් සිත බියද කරවයි
රටක් ගිනි ඇවිලෙනා කල 
කෙසේ නම් සිත සනසවන්නද

සිප් සතර නිමා වූ කලක් වී නම්
පලා යන්නෙමි රට හැර නොසිට
වරම් නැත නිදහසේ පියඹන්න
අවාසනාව පසුපසින් එන කල

නිල ඇඳුම වෙත නිතර 
නිසි ගෞරවය දෙන්න
අවැසි මිස අනවැසි ලෙසින්
නොදිය යුතු ඒ ගෞරව සුදුසු

---රඛිත---

~~ අපි වෙනුවෙන් ~~

 

අට පැයක් දස පැයක් නොව

ඇතැම් විට දොළොස් පැයක්

වැඩ අඩුව අධිකව විඩාපත් වූ

දහස් ගණන් වූ දනන් ඇතිවද

 

සොච්චමක් ලබන්නට

දහදිය වගුරුවා පැය ගණනක්

සිත ගතත් වෙහෙසවා

පීඩන බිණුම් කැපුම් කෙටුම් මැද

 

පාගා දමා බිම් මට්ටමට

නොලැබ පිළිගැනුමක්

දහසක් වූ පැතුමන් පිරි

හැඟුමන් සදා සිහිනයන් වූ

 

අණ පනත් රීති නීති රෙගුලාසි

ගොන්නකට මැදිව සිරවී සිටත්

නොලැබ සැනසුමක් හෝ අයිතියක්

සදාකල් වහල් බව ලබා සිටිනට

 

හිරු නුදුටු සඳ නොදුටු දිනද ගත වෙනා

සති අන්ත යහනටද නින්දටම ලත වෙනා

ජීවිතය දකින්නට සොයන්නට කාලයක්

ලැබේවිද දිනයක් අපටත් දිවි විඳින්නට

 

බිඳ දමා යදම් බැඳි සිඳ දමා රැහැන් බැඳි

දමා මුලිනුපුටා සූරා කන අමනයන් රැල

බැස මහ මගට පවසා සටන් පාඨ පෙළ

අරඹන්න අරගලය නොපමාව සැම එක්ව

 

ගුවන සිසාරා ලෙළදෙන්න රතු ධජය

මිහිකත සිසාරා ජන හඬ පතුරුවා ලන්න

සයුරු තල මතින් ගෙනයන්න ලොව පුරා

සාධාරණතත්වය රැගෙන සමානාත්මතාවය

 

අරගල කැරළි සටන් මැදින් ජය ටැඹ වෙතට

ගමනට අදිටනින් වෙර වඩමු අප සැමත්

දිනන්නට සම අයිතියත් මව් බිමේ උරුමයත්

කැප වී සිටිමු නිති අප වෙනුවෙන් සැමත්

 

---රඛිත---

~~ බියෙන් විඳවා ~~

ලෙය රත් විය ගත 

පහර දෙන කල නිළ දරුවන්

පීඩිත ජනයා වෙත 

පොලු මුගුරු වෙඩි පහරින්

අංකිතව දුටු දසුන් 

පැරදවිය ප්‍රඥාව හදවත් හැඟුම

අතැඟිලි දිව ගියා 

යතුරු පුවරුව පුරා තනා වැකි

පොලිස් ත්‍රිවිධ බල හමුදා වෙත 

නොව පමණ යොමු වූ සඳ වෛරය

අක්ෂර ගැට ගැසී තැනූ වැකියකි 

සියල් හමුදා පොලිස් පවුල් රිදවන

කොන් කරන්නට දුටු තැන 

පවුල් සහ ළමුන් සියලු තැන්හි සිට

එහි ලියැවී තිබුනි වෛරය පිරි 

හැඟුමන් පිරි වැකි මතින්

දිනක් ගත වන්නට මත්තෙන් 

ඇදී ආ සඳ විරෝධය දසතින්

නොවේ අරගලයක් මෙසේ 

ගුණමකු කමද යන්නට විමසා

අසැබි වදනින් නොව පමණ 

අපහාස උපහාසයන් පිරිව

දසත සංඛ්‍යාංගික අවකාශයේ 

විසිරි ගොස් තිරිසනෙකු ලෙස

පණිවුඩ ලෙසින් තර්ජන ගර්ජන පැමිණ 

රුව යොදා තැනූ අපහාසයන් විසිරි යමින්

ඉවත් කළද ලියූ වැකි එ සැණින් සිටම

පමා වැඩි විය උන් ගෙන ඇති සැන රූ එහිද

දසතින් පැමිණ ඇත නේක ආරංචි පෙළ

ගත සිත බියෙන් කරවා සලිත වී ඇතිව 

එය බෙදා හැර ඇතිලු හනිකට සියල්

ත්‍රිවිධ හමුදා පොලිස් සමූහ තුළ නියම ලෙස

වසා දමා මුහුණු පොත් හා සියල් සමාජ ජාලා 

සැඟව යමි අංකිත අවකාශයෙන් පලා ගොස්

බිය දැනේ හද නීතිය සොයා ඒවිද වරදක් බලා

සැනසුමක් අහිමි විය එයින් මතු සැම දිනක

අසික්කිත නැහැදිච්ච නූගත් දනන් වදන් ගෙන

නොදන්නා මව්පියන් හට බැන වදිනා ගතිය කැත

සියල් විඳ දරා නිහඬව සිට බියෙන් මිරිකී සිට

කල් ගත වනු කිමද මෙලෙසින් සෙමෙන් යන

නවතන විට රථයක් දකින විට නාදුනන මුහුණක්

සැක බිය ඉතිරී පැමිණෙනා හානියක් වේදෝ සිතා

ගොඩ නගා ගත් නාමය ගෞරවය කලක සිට

සියල් වැනසී ගොසින් හැඟුමන් නිසා ආවේගයට

කල් ගතව ගිය වුවත් බිය රැඳී සිත නොවේ සැනසුම

තවමත් පල වේය සැන රුව පීඩිත වදන් රැඳී ඇති

සැඟව සිටිමි හැකි නම් පලා යමි අත්හැර දමා නම්

පැතුමන් ඉලක්කයන් ආ ගමනත් නිමා කරමින්

---රඛිත---